仔女海外留學基金 應盡早儲錢滾存

又到開學時候，曉陽唔少同事都係家長，一直都煩惱緊升學打算，部分更加已經將仔女送去外國，要當心嘅事情就更多。

早前有海外留學規劃調查發現，近7成受訪家長期望子女到海外升讀中小學，另有近6成打算到海外留學嘅受訪者係為咗追尋夢想。

調查亦反映海外留學嘅教育開支所費不菲。唔少受訪者預計每年平均留學開支將近80萬元，包括學費（平均27.3萬元），其次為生活費用（平均18.5萬元）、住宿費用（平均17.8萬元）同消閒費用（平均14.3萬元）。

就算高達86%嘅父母會幫仔女提供平均每月3.5萬元額度嘅信用卡，唔少留學生仍會為咗賺取工作經驗同生活費，趁喺海外升學時參與實習（61%），甚至有45%嘅留學生會從事非體力勞動兼職工作。

所以留學真係需要花費一筆頗大嘅開支，就算本身有儲蓄，但對於唔少家庭嚟講，係一個頗大嘅負擔。

有唔少啱啱生咗BB嘅同事都問曉陽，有無咩方法可以填補呢筆開支。曉陽就覺得，如果有心想為仔女提供海外升學機會，最好真係盡早安排留學基金，例如趁小朋友仲細，就儲定一筆錢，最好可以作固定利息滾存，咁樣一嚟，小朋友由1至12歲，甚至到18歲期間，就有足夠時間滾存一筆資金，即使唔能夠覆蓋所有留學開支，都不失為一個好好嘅緩衝，唔會突然之間對家庭財政造成重大壓力。

（本欄逢周四刊登）